Орталық Азиядан келген студенттер Қытай университеттеріне түсу тәжірибесімен бөлісіп, жергілікті емтихандарды тапсыру ерекшеліктері туралы айтты.
Феруза Кариева, қаласы — Шанхай, коммерция жөніндегі менеджер, @feruza_in_chinaa
Оқуы жайлы
Мен магистратураны Шанхай шетел тілдері университетінің «Аударма теориясы — орыс-қытай аудармасы» мамандығы бойынша бітірдім. Қытайлық ком панияда коммерциялық менеджер және аудармашы болып жұмыс істеймін. Сонымен қатар осы университетте PhD докторантурада оқып жатырмын.
Қытай университетіне қалай оқуға түсуге болады
Әр университеттің талаптары да әртүрлі, дегенмен ортақ талаптар бар. Мысалы, HSK сертификаттарының болуы: магистратура мен докторантураға түсу үшін — HSK 5-6, бакалавриат үшін — HSK 4.
Университеттің рейтингі жоғары болған сайын, оған түсу де қиынырақ болады. Демек, қабылдау емтихандары да қиындай түседі. Әдетте грантқа емес, өз қаражатыңызбен өтініш беру оңайырақ. Бірақ сәттілікті сынап көрген жөн. Мен өзім үш рет CSC грантын жеңіп алдым, сондықтан әрқашан тырысып көру керек деп ойлаймын!
Магистратура мен PhD докторантураға түсу емтихандары екі кезеңге бөлінеді: ауызша және жазбаша. Ауызша емтиханға дайындалу кезінде сіз осы институт пен мамандықты не үшін таңдағаныңызды нақты түсінуіңіз керек. Бұл әдетте ауызша емтихан кезінде сұралады. Сондай-ақ халықаралық студенттер офисімен немесе емтихан күнін белгілеуге жауапты тұлғамен үнемі байланыста болуыңыз керек. Әдетте жаңа оқу жылының емтихандары наурыз айында басталады.
Ұсынымдар
Университет пен мамандықты таңдағанда, пікірлерді оқыңыз немесе қытайлық досыңыздың пікірін сұрап біліңіз. Instagram-нан сізге ұнаған университеттің хэштегтері бойынша адамдарды тауып, олардан ақпарат сұрауға болады. Университетке құжат тапсырған кезде тілді білетініңізді немесе басқа да жетістіктеріңізді растайтын түрлі сертификаттарды бірге тапсыруға тырысыңыз.
Мадина Маликова, 23 жаста, қаласы — Гонконг, маркетолог, блогер, @macifiqa
Оқуы жайлы
Мен Гонконгтағы Hong Kong Baptist University-де Master of Science in Business Management мамандығында оқимын. Екі жыл бұрын Қытайдағы Чжэцзян университетінде экономика бакалавры дәрежесін алдым.
Қытайға қалай оқуға түсуге болады
Ағылшын тілінде оқуды жоспарласаңыз, IELTS немесе TOEFL сертификатын, ал қытай тілінде оқуды жоспарласаңыз, HSK алуыңыз керек. Бұл сертификаттар университеттің сізді тілді білетіндігіңізге сенімді болуы үшін қажет. Сондай-ақ мектепті бітірген кезде GPA (орташа балл) маңызды. Қазақстанда ең жоғары GPA — 5,0. Қытайдағы беделді университетке түсу үшін GPA-ның 4,6-дан жоғары болғаны жөн.
Портфолиоңыз қабылдау процесіне оң әсер етеді: спорттағы, шығармашылық пен ғылымдағы жетістіктеріңіз, әлеуметтік жобаларға қатысуыңыз. Портфолио белсенділігіңізді тек оқуда ғана емес, сонымен қатар сабақтан тыс жұмыстарда да көрсетуге көмектеседі. Жеңістеріңіз туралы айтудан қысылмаңыз!
Ең алдымен белгілі бір университетке арнайы онлайн жүйе арқылы грантқа өтінім беруіңіз керек. Егер университет үміткерлігіңізді қарауға қабылдаса, келесі қадам — көбінесе Zoom сұхбаты. Ол шамамен 10-15 минутқа созылады және оның барысында мамандығыңызға қатысты, сондай-ақ жекелеген сұрақтар да болады. Сұхбат нәтижелеріне және портфолиоңызға сүйене отырып, университет сізді қабылдау немесе қабылдамау туралы шешім қабылдайды.
Қытайға құжат тапсыру кезінде ең бастысы — тілді меңгеру және IELTS, TOEFL немесе HSK емтихандарын сәтті тапсыру.
Мен ағылшын тілінде оқыдым, сондықтан IELTS тапсырдым. Оның құрылымын түсіну және сәтті өтудің амалдарын білу үшін бұл емтиханға алдын ала дайындалған жөн. Әдетте IELTS екі күнге бөлінеді: бірінші күн — writing, listening және reading, ал екінші күн — speaking. Қытайдың жақсы университетіне түсу үшін кем дегенде 6,0, ал егер университет қарапайым болса, 5,5 балл жинау керек.
Оқуға түсудің ең маңызды сәті — егжей-тегжейлі айтыла бермейтін сұхбат және бұл маңызды. Өйткені сұхбаттасу кезінде сіз өтініш берген кафедра меңгерушісі университетте оқуға лайықсыз ба, жоқ па, соны шешеді.
Сұхбатқа алдын ала дайындалып, біреуден көмек сұраған дұрыс. Досыңыз сізге сұхбатта жиі қойылатын сұрақтар қойсын, сонда сіз дұрыс жауап беруге жаттығасыз. Сұрақтарға жауаптарды алдын ала жазып, қағаздан оқуға болмайды, себебі қабылдау комиссиясына мұндай нәрселер ұнамайды.
11-сыныптың басында ағылшын тілін білу деңгейім төмен болды. Сондықтан қазан айында мен IELTS репетиторын тауып, алты ай бұрын оқуды бастадым. Наурыз-сәуір айларында IELTS емтиханына алдын ала тіркелген дұрыс, себебі қажетті балл жинай алмасаңыз, оны қайта тапсыра аласыз. Тағы бір мүмкіндік бар екенін білу психологиялық қысымды төмендетеді. Ал мен белгіленген ең соңғы мерзімге сәтсіз тіркелдім, сондықтан менде екінші мүмкіндік болмады, сол себепті қатты уайымдадым.
Ұсынымдар
Ағылшын тілінде оқысаңыз да, Қытайда қытай тілінсіз өмір сүру өте қиын. Сондықтан мен ең болмағанда негіздерін үйренуді ұсынамын.
Сондай-ақ ел мәдениетінің ерекшеліктерімен танысу да артық болмайды: декольтені ашпаңыз, күрішке таяқшаларды қадап салмаңыз дегендей. Себебі шетелде біз қонақпыз — жергілікті халықты сыйлаған жөн.
Ең бастысы — еңбекқорлық, шыдамдылық және табандылық. Шетелдік ЖОО-ға, әсіресе грантқа түсу – табандылық пен тәртіпті қажет ететін ұзақ процесс. Бірақ бұл соған тұрарлық!
Темирлан Оторбаев, 25 жаста, қаласы — Шанхай, студент, @temirlanotorbaev
Оқуы туралы
Мен Шанхай университетінің халықаралық білім бөлімінің екінші курс студентімін, шетелдіктер үшін қытай тілінің мұғалімі. 2021 жылы Шанхай қалалық стипендиясына құжат тапсырып, толық грантқа ие болдым. Оқуым және жатын орным тегін. Сондай-ақ ай сайын 2500 юань стипендия аламын.
Қытайға қалай оқуға түсуге болады
Қытайға оқуға тапсырардағы ең маңыздысы — қытай тілін білуіңіз. HSK емтиханының сертификаты қажет. Hanyu Shuiping Kaoshi 汉语水平考试 — қытай тілінде сөйлемейтіндердің күнделікті, жұмыс және оқу жағдайында қытай тілін қолдану дағдыларын бағалайтын халықаралық біліктілік емтиханы. Ол Қытайдағы университеттерге немесе басқа оқу орындарына түсу кезінде, сондай-ақ жұмысқа орналасу кезінде қытай тілін меңгеру деңгейін растайды. Бакалавриат үшін HSK 4, магистратура үшін HSK 5 талап етіледі, ал тіл курстарына HSK-сіз түсуге болады.
HSK алты күрделілік деңгейіне бөлінеді және екі тәуелсіз бөліктен тұрады: ауызша және жазбаша. Қырғызстанда тестіні Бішкекте, ҚҰУ жанындағы Конфуций институтында немесе БМУ-да тапсыруға болады. Мен бакалавр дәрежесіне HSK 5 тапсырдым. Емтиханға үш-төрт ай дайындалдым.
Қытайға өтініш бергенде үш кезең бар:
— қажетті құжаттарды жинап, сайтта тіркелесіз
— құжаттарыңызды тексергеннен кейін сұхбатты күтесіз
— шақыруды күтесіз
Ұсынымдар
Емтиханға жақсылап дайындалып, көп сөздер мен грамматиканы үйренге, еш уайымдамауға кеңес беремін. Жиі кездесетін қателік: көпшілігі уақытты қадағаламайды да, барлық сұраққа жауап беруге үлгермей қалады.
