Мен Англиямен Оксфорд қаласы арқылы таныстым, бұл кішкентай және өте әдемі қала. Бұл өмірімдегі ерекше кезеңі еді. Мен осында жаз маусымын өткіздім және сол кезде Лондонда Олимпиада ойындары өткен болатын.
Бұл шетелге жалғыз өзім шыққан алғаш сапарым болды. Күлкілі болып естілсе де, басты қорқынышым – әуежайда адасып, жоғалу еді. Бірақ бақытқа орай мен мектептен келетін трансферге тапсырыс беріп, Лондонның әуежайынан мені асырайтын отбасымның үйіне дейін жеттім. Сонымен қатар адамдармен қалай араласатыным жайында уайымдадым, себебі сол кезде ағылшын тілім нашар деңгейде болатын.
Алғашқы әсерді айтып жеткізе алмаспын. Бұл таңқаларлық жағдай емес, себебі Оксфорд – өмірімде көрген қалалардың ішіндегісі ең көріктісі. Сәулеті керемет ғимараттарға сағаттап қарауға, төселген көшелермен серуендеп, кішкентай дүкендер мен кофеханалардың сөрелеріне үңілуге, университеттердің әдемі ғимараттарынан шығатын студенттерді бақылауға болады.
Мен Колумбиядан келген қызбен ағылшын отбасында тұрдым. Отбасы сүйкімді еді, үй кішкентай, бірақ жайлы болатын. Олар ешқашан кешкі асты дастархан басында отырып ішпейтіндері қызықты еді. Тамағы бар тәрелкелерді және сусындарды алып, теледидар алдында отырып, жейтін. Бұл мен үшін ерсі болды, себебі Қазақстанда тамақты дастархан басында отырып ішу қалыптасқан. Қонақтар келсе де, олар үстел басына отырмайды.
Жергілікті адамдары жайдары және жылы шырайлы болып келеді. Жастары шулы, көңіл көтеруді және жаяужолда отырып, қатты дауыстап әңгімелесуді ұнатады. Осында киімге аса назар аудармайтынын байқадым. Олардың сәні ерекше.
Мен оқыған мектеп үлкен болмаса да, заманауи болды және орталыққа жақын жердегі ну орманның ішінде орналасқан. Мектептің жанында жатақхана бар, бірақ маған көрсеткен бөлмелері кішкентай және ыңғайсыз болды. Сол себепті отбасыда тұруды таңдағаныма ризамын.
Англияның бейресми ұлттық fish and chips тағамын міндетті түрде жеп көру керек. Бұл фритюрда қуырылған, картоппен берілетін балық. Оны көбінесе дәмханаларда немесе өзімен алып кетіп жейді.
Жабық базарға, Covered Market-ке баруға және Ben’s Cookies үй піспенандарын сатып алуға кеңес беремін. Осында піспенандардың алуан түрлері бар және олар әрқашан жаңа піскен, жылы күйде сатылады.
Оксфорд — барлық дерлік көрікті жерлері қолжетімді жерлерде орналасқан кішкентай қала. «Гарри Поттер» фильмі түсірілген жерлерге баруды ұмытпаңыз. Айтпақшы, Гермионаны ойнаған Эмма Уотсон осында тұрды.
Мен қала ішінде автобуспен жүрдім. Бұл ыңғайлы және жол жүру билетін алсаңыз, үнемді. Түнде де қала бойынша автобустар жүреді, бірақ аялдамада сағатына бір рет тоқталады.
Қаладағы ауа-райы құбылмалы. Бірақ біраз уақыт өткеннен кейін, мен бейімделдім: егер таңертең күн шуақты болса, түстен кейін жаңбыр болатынын нақты айтуға болады және керісінше. Сол себепті өзімен бірге қолшатырды алып жүрген жөн.
Оксфордтан Лондонға дейін автобуспен жетуге болады. Ал оның жанында поезбен жетуге болатын әртүрлі кішкентай және қызықты қалалар орналасқан.
Егер Лондонда болсаңыз, айтып жеткізе алмайтын атмосфера мен сұлулыққа ие осы қалаға бір-екі күніңізді бөліп, соғып кетуді ұмытпаңыз.
Оксорд қаласынан алған әсерімен бөліскен – Анара Іңкәрбекова.
