Орталық Азиядан келген студенттер қос диплом бағдарламасы бойынша оқу тәжірибесімен бөлісті.
Жансая Бегдазым, 26 жаста, қаласы — Астана, өнім талдаушысы, @zhansaya_begdazym
Бағдарлама жайында
Мен ҚазАТУ және UNIMI университеттерінің қос дипломдық білім беру бағдарламасының түлегімін.
Бағдарламаны таңдауыма мыналар себеп болды:
— Білім сапасы. Оқу процесі өте қарқынды болды. Ғылыми-зерттеу жұмыстарына, атап айтқанда, шетелдік профессорлармен жұмыс жасауға көп көңіл бөлінді.
— Саяхаттың болуы. 20 еуромен бірнеше сағатта басқа қалаға немесе тіпті көрші елге бара аласыз.
— Студенттерге арналған бонустар. Еуропада студенттер үшін көптеген жеңілдік бар: көлікке жеңілдіктер, мұражайларға, кинотеатрларға және басқа да қызмет түрлеріне тегін кіру.
Оқу тәжірибесі туралы
Бұл сапар менің көңіл көкжиегімді, ой-өрісімді кеңейтті. Топтағылармен бірге мамандығымызға жаңаша көзқараспен қарап қана қоймай, қызықты өмірлік тәжірибе алдық.
Ал Италия фильмге арналған декорация іспетті: қайда қарасаң да, барлық жер әдемі. Бұл жерде бақытсыз болу мүмкін емес!
Ақыл-кеңес
Кез келген үміткерде жоғары GPA деңгейі болуы қажет және екі университет ұйымдастырған ағылшын тілінен тест тапсыруы керек. Мен оқуға түскен жылы талапкерлер көп болды, бірақ іріктеуден бес магистрант қана өтті.
Бірақ бұл бағдарламаға қатысу сіздің барлық күш-жігеріңізге тұрарлық.
Озода Азизова, 25 жаста, қаласы — Мюнхен, инженер-жобалаушы, @ozodaz
Бағдарлама жайында
Алғашқы жоғары білімді Ташкент қаласындағы Турин политехникалық университетінде «Азаматтық құрылыс» бағыты бойынша алдым. Оқу барысында грант ұтып алып, Германиядағы атақты Баухауз университетінде алты ай оқыдым.
ТПУТ-та қос диплом алу үшін барлық мүмкіндік бар. Университет сонымен қатар әлемнің әртүрлі университетінде білім алуға мүмкіндік беретін қосымша студенттермен алмасу бағдарламаларын ұсынады. Іріктеу критерийлері, бір қарағанда, қарапайым, оған қоса жетістік те үлкен рөл атқарады. Белсенді студенттік өмір немесе спорттағы марапаттар сияқты қосымша жетістіктер болса, тіпті жақсы.
ТПУТ жыл сайын студенттерді Италияға жібереді және бұл үшін сізге ерекше күш салудың қажеті жоқ, тек ол жақта тұру кезінде өзіңізді қаржылық қамтамасыз ету керек. Сондықтан қос диплом бағдарламасы университет студенттері арасында өте танымал. Бұл сізге еуропалық білім беру жүйесін толық меңгеруге мүмкіндік береді.
Оқу тәжірибесі туралы
Басында өте қиын болды. Ұйымдастыру мәселелері көп уақытты қажет етеді. Бірақ егер сіз оны шынымен қаласаңыз, бәрі мүмкін. Мен жалғыз кеңес бере аламын: көпшіл болу және достық қалып таныту әрқашан көмектеседі.
Германияға сапардан алған әсерім керемет болды. Бұл шынымен болып жатқанына сену қиын болды. Бағдарламалар басқа елдің мәдениетімен танысуға, сондай-ақ достар табуға мүмкіндік береді. Қызықты сәттерден басқа, оқуды да ұмытпаған жөн. Германияда бұл өте қиын, әсіресе инженерия саласында. Бәсекелестік өте үлкен, үздік шетелдік студенттер жиналады. Артта қалуға болмайды, үнемі ізденіп отыруыңыз керек.
Ақыл-кеңес
Германиядағы оқу тәжірибесінің арқасында оқуымды осы елде жалғастырғым келді. Екі жылдан кейін қайтып келіп, елдегі ең үздік университте оқып жатырмын.
Шетелде оқу қиын, бірақ оқу процесінің артықшылықтары мен мотивациялары бар. Өзіңізді барлық қиындықты жеңе алам деп сендіру маңызды.
Томирис Орымбаева, 20 жаста, қаласы — Астана, студент, @suntomiris
Бағдарлама жайында
Мен M.Narikbayev KAZGUU University және Германиядағы Hochschule Hof University университеттерінің түлегімін.
Әрқашан шетелде оқығым келетін. Шетелде оқу тәжірибесі түлектерге көптеген мүмкіндік береді. Мысалы, әлемнің кез келген жерінде жұмыс істей аласыз, жергілікті оқыту жүйесі мен мәдениетімен танысып, ой-өрісіңізді кеңейтесіз. Осы факторлардың барлығы маған қос дипломдық бағдарламаны таңдауға ықпал етті.
Мұндай оқытудың бірқатар артықшылықтары бар. Төрт жылда екі бакалавр дәрежесін алуға болады, бұл уақытты үнемдейді. Бәсекеге қабілеттілік тек еңбек нарығында ғана емес, сонымен қатар шетелдік оқу орындарына одан әрі оқуға түсуде де артып келеді.
Бағдарламаға қатысу үшін университет төмендегілерді талап етті:
— GPA 2.67 және одан жоғары
— М M.Narikbayev KAZGUU University-де 120 ECTS-ті табысты игеру
— ағылшын тілі деңгейі В2-ден төмен емес
— сұхбаттан өту
Шетелге көшу басында белгісіз қорқыныш тудырды. Бірақ қиындықтардың арқасында тұлға ретінде өсесің. Бастапқыда бұл қорқынышты болғанымен, қазір ол менің тұлға ретінде өсуіме көмектескен керемет тәжірибеге айналды.
Оқу тәжірибесі туралы
Жаңа ел мен мәдениетті үйрену өте қызықты. Бұл өмірге көзқарасты жаңартуға көмектеседі. Германияның білім беру жүйесінде мұғалімнің жетекшілігімен өз бетінше білім алуға үлкен мән берілген. Hochschule Hof-та кейбір пәндер бойынша профессорлар сессияны тапсыру үшін жобаны таңдауда толық еркіндік берді. Бұл жағымды тосынсый болды, өйткені біз өзімізге қызықты тақырыптарды таңдадық.
Тек қазақстандық емес, шетелдің дипломын алу Еуропалық Одақ елдерінде жұмыс істеуге мүмкіндік береді.
Ақыл-кеңес
Германияға қос диплом бағдарламасы бойынша бір жылға бару туралы шешім менің өмірімдегі ең керемет шешім болды. Маған қолдау көрсетіп, сенім білдірген отбасыма алғыс айтамын. Қоныс аудара отырып, мен бойымдағы жаңа қасиеттерді аштым, Еуропа елдерінің мәдениетімен таныстым, тамаша адамдармен таныстым және ең бастысы, бүгінде маған көмектесетін баға жетпес өмірлік тәжірибе алдым. Неміс университетінде оқу ақпараттық технологиялар мен бизнес саласында hard skills-ті дамытуға мүмкіндік берді.
Мен қос дипломдық бағдарламаны ұсынамын, өйткені бұл екі құжат алу үшін ғана емес, сонымен қатар кәсіби және тұлға ретінде өсу үшін тамаша мүмкіндік.
Дастан Алтыбай, 21 жаста, қаласы — Алматы, студент, @dastannjan
Бағдарлама жайында
Мен ҚБТУ Халықаралық экономика мектебінің төртінші курс студентімін.
Мектепті бітіргеннен кейін мен университет таңдау алдында тұрдым және ҚБТУ-дағы Халықаралық экономика мектебінің факультет мүмкіндіктерімен, атап айтқанда, қос диплом бағдарламасымен таныстым. Бұл факультетті тереңірек білуге шешім қабылдауымның басты себептерінің бірі болды. Мен LinkedIn арқылы ХЭМ түлектері мен студенттерімен байланысқа шықтым. Олар өз тәжірибелерімен бөлісіп, қос диплом бағдарламасының артықшылықтарын, оқу барысында кездескен қиындықтары жайында әңгімелеп берді. Олармен хат алысқаннан кейін мен Мәскеу экономика мектебінің факультетіне тапсырдым.
Қос дипломның басты артықшылықтарының бірі — оның халықаралық деңгейде мойындалуында. Кейбір түлектердің London School of Economics and Political Science-ке және әлемнің басқа да жетекші университеттеріне магистратураға түсуі мені таңғалдырды.
Оқу тәжірибесі туралы
МЭМ-ге оқуға түсу критерийлері қарапайым. Бірінші курсқа түсу үшін IELTS емтиханынан кемінде 5,0 балл жинап, ҰБТ-ның математикалық бөлімдері бойынша мүмкін болатын 40 ұпайдың кемінде 30 ұпайын жинау керек. Бірден екінші курсқа түсу мүмкіндігі де бар. Дегенмен бұл үшін математикадан кемінде C деңгейіндегі A-level сертификаты немесе IB сертификаты немесе микро-макроэкономика, статистика және математика бойынша кемінде 3-деңгейдегі AP бағдарламасы бойынша емтихандар тапсыру қажет. Сонымен қатар сізде IELTS-тың 6.0-дан кем емес сертификаты болуы керек.
МЭМ-де оқу үшін күшті математикалық білімнің болуы маңызды. Өйткені жыл сайын математика күрделене түседі. Ағылшын тілін жақсы білу — табысты оқудың тағы бір маңызды факторы.
Өз басым өткен жылы тағылымдамадан өтетін жер іздегенімде қос диплом көмектесті. Көптеген жұмыс берушілер ХЭМ-ді қаржы және экономика саласында дарынды студенттер дайындайтын мықты бренд ретінде қарастырады. LSE — әлемдегі экономика және қаржы саласындағы ең беделді университеттердің бірі. Мұнда мықты студенттер бар. Академиялық база өте күрделі және үлкен көлемдегі ақпаратты меңгеру үшін көп уақыт пен күш қажет.
Ақыл-кеңес
МЭМ-де оқу нағыз марафоншының дағдыларын қалыптастырды. Мұнда жақсы нәтижеге жету үшін үнемі оқуың маңызды.
