Жазира Ғариполла АҚШ-та бағдарламашы болып жұмыс істейді. Сонымен қатар шетелдегі өмір туралы өз блогын жүргізеді. Ол АҚШ-қалай қоныс аударғанымен бөлісті.
Жазира Гариполла, 25 жаста, қаласы — Сиэтл, Google-де Software Engineer, @zhazira__life
Қоныс аударуы туралы
Мен Қазақстанның мұнайлы астанасы Атырауда туып-өстім.
Өткен жылы күйеуіммен бірге АҚШ-қа қоныс аудардық. Ол бастапқыда Германиядағы Google компаниясында жұмыс істеді, бірақ командасын Сиэтлде орналасқан командаға ауыстырды. Қазір мен де осы компанияда Software Engineer болып жұмыс істеймін.
Жаңа өмірге бейімделуі және қиындықтары жайлы
Құрама Штаттардағы жаңадан келген иммигрант үшін қиындықтардың бірі — несие тарихының болмауы. Мұндағылардың барлығы біздегідей дебеттік емес, несиелік картаны пайдаланады. Сондықтан кейбір тұрғын үй кешендері несие тарихың жоқ болғандықтан, үлкен депозит талап етеді. Ал көлік сатып алғанда, несиеге алуға рұқсат берілмейді, бірден барлық соманы төлеуге тура келеді. Бір жақсысы, АҚШ-та көліктер Қазақстанға қарағанда әлдеқайда арзан.
Медициналық сақтандыруды алу да біраз уақытты алады. Америка Құрама Штаттарында дәрі-дәрмектің бағасы қымбат, сондықтан көшер алдында тексерулерден өтіп, өз еліңізде емделіп, алғашқы медициналық көмек қобдишасын өзіңізбен бірге ала жүргеніңіз дұрыс.
Ең басты проблема — жұмысқа рұқсаттың жоқтығы. Жұмыс істеу үшін менің L2 визама қосымша құжат — EAD картасы қажет болды. Оны рәсімдеу пандемияға байланысты жеті айға кейінге қалдырылды. Көптеген технологиялық компаниялар жалдау кезінде заңды түрде жұмыс істей алатын кандидаттарды қарастырады. Осыған байланысты мені көп жер жұмысқа қабылдамады. Мұндай жағдайларға дайын болуыңыз керек.
Алғашқыда маңызды құжаттардың барлығы поштамен жіберілетініне таңғалдым. Маған сонымен қатар Amazon-ның жылдам әрі ыңғайлы жеткізілімі ұнады. Әрбір тұрғын үй кешенінде сәлемдемелерге арналған арнайы бөлмелер бар, онда пин-кодпен кіріп, сәлемдемеңізді алуға болады.
Шетелде жалғыздықты сезінуіңіз мүмкін
Шетелде жалғыздықты сезінуіңіз мүмкін. Сондықтан үйде отыра бермей, серуендеуге шығыңыз, қызығушылық тудыратын әртүрлі іс-шараларға жазылыңыз, ит немесе мысық асыраңыз. Күн тәртібіңіздің қалай өзгеріп кеткенін байқамай қаласыз, осылайша жаңа өмірге тез үйренесіз.
АҚШ-та қалай жұмыс іздеуге болады
Жұмыс істеуге рұқсат алғаннан кейін мен Google, Meta, Amazon және Door Dash сайттарында сұхбаттан өттім. Нәтижесінде маған бірнеше ұсыныс түсті. Алғашқыда Door Dash-те жұмыс жасап, кейінірек Google-ге ауыстым.
Сұхбат алу мүмкіндігін арттыру үшін ірі компанияларда жұмыс істейтін таныстарыңыздан немесе достарыңыздан ұсыныстар жаздырып алғаныңыз жөн. Ол үшін нетворкингті дамытыңыз, LinkedIn-дегі профиліңізді жақсартыңыз, жергілікті конференцияларға барып тұрыңыз.
Ағылшын тілін меңгеруден бөлек, жұмысқа орналасу үшін сұхбаттан өту дағдысы қажет. Мұнда үміткерлерді таңдау форматы әртүрлі, сондықтан бірнеше сынақ сұхбаттарын өткізіңіз, рекрутермен сұхбат курстарынан өтіңіз, Leet Code бойынша мәселелерді шешіңіз және soft skills-пен жұмыс жасаңыз.
Google-де жұмыс істеу туралы
Мен YouTube командасымен жұмыс істеймін. IOS құрылғыларындағы әлеуметтік желі мобильді қосымшасының барлық жаңа мүмкіндіктері — біздің жұмысымыз. Маған миллиондаған адамдар қолданатын өніммен жұмыс істеу ұнайды, бұл қолданбаны пайдалану тәжірибесін жақсырақ және ыңғайлы етеді.
Google қызметкерлеріне қамқорлық жасайды. Барлық қолайлы жағдайы бар заманауи кеңсе күнделікті жұмыстарға алаңдамай, жұмысты тезірек аяқтауыңа көмектеседі. Google — алты айлық декреттік демалысты енгізген аздаған компаниялардың бірі. Бұл АҚШ үшін жомарттық десе де болады. Сондай-ақ Штаттарда әкелер де декреттік демалысқа шыға алады.
Google қызметкерлеріне қамқорлық жасайды
Компанияда ешкім бір-бірін кінәламайды. Егер қандай да бір ақаулар туындаса, барлық кінәні бір ғана қызметкер өз мойнына арта салмайды. Оны ешкім сөкпейді, айыптамайды. Керісінше, командалар бірлесіп жұмыс істейді және болашақта мұндай проблемалардың алдын алу үшін жүйелерді әзірлейді.
Қоныс аудару қалай әсер етті
Қоныс аудару маған көп нәрсені үйретті. Менің ойым мен сөзім өзгерді. Мен оптимистік тұрғыдан ойлауды және сөйлеуді, конструктивті сынды қабылдауды және айтуды үйрендім.
Құрама Штаттарда еркіндік пен тәуелсіздік рухы мықты сезіледі. Ешкім ешкімді айыптамайды, өзіңді қай қырыңнан көрсетсең де, шектеу жоқ. Сондықтан мен шағын блог жүргізе бастадым.
