Бурабай баурайында бақ сынасатын «Astana Arlans» және Ресейдің «Patriot Boxing Team» клубтары бүгін Көкшетауда баспасөз конференциясын өткізді.
Салмақ өлшеп, халық пен журналистердің сұрақтарына жауап берді. Боксшыларды Бүкіләлемдік бокс сериясының 8-кезеңі аясында маңызды кездесулер күтіп тұр. Бес салмақ дәрежесі бойынша сынға түсетін біздің былғары қолғап шеберлерінің дайындығы мықты, – дейді мамандар. Көрші елдің боксшылары да осал емес. Сондықтан ертең керемет бокс кеші өтеді деген сенім бар. Конференция барысында ресейліктер Қазақстан бокс мектебін бүгінде бүкіл әлем мойындап отырғанын жеткізді. Жиын соңында жергілікті халық боксшылармен естелік фотосуретке түсті. Айта кетейік, Щучинскте өтетін ертеңгі 5 жекпе-жектен тұратын бокс кешін «Хабар» телеарнасы сағат 17:20-да тікелей эфирде көрсетеді.
