«Рэкетир», 2007
Фильмде Алматыда туып-өсіп, бокстан үлкен үміт күттіретін Саян есімді жас жігіттің өмірі мен тоқсаныншы жылдардағы қоғам бейнесі суреттеледі. Бас кейіпкер жалаң білектің күшімен болашаққа жол ашуға, барлық мәселені жұдырықпен шешуге болады деп ойлайды. Алайда бұның түбінде маңдайын тасқа соғатынын іштей түйсінеді.
2015 жылы фильмнің екінші бөлімі жарыққа шықты.
«Адасқан», 2009
Мистикалық триллер жанрында түсірілген фильм. Бас кейіпкер, әйелі мен кішкентай баласы шөл далада адасып, ауыл арасындағы жолда түнеп шығады. Келесі күні таңертең басты кейіпкер оянып, жалғыз қалғанын түсінеді – әйелі мен баласы жұмбақ түрде жоғалып кетеді.
«Жаужүрек мың бала», 2012
Тарихи драма қазақ халқының жоңғар шапқыншылығына қарсы ерлікпен күрескен XVIII ғасырдың бірінші жартысын қамтиды. Сол кезде қазақ жасақтары бірігіп, басқыншыларға тойтарыс беріп, майданда шешуші жеңістерге жеткен еді.
Сюжет желісі бойынша Сартай батырдың өзіндей өрімдей жас, жеткіншек сарбаздарды ту көтеріп, жорыққа бастап шыққаны баяндалады.
«Анаға апарар жол», 2016
Негізгі желісі ана махаббатынан бастау алады және қазақ халқының басына түскен ауыр кезеңдерді – ұжымдастыру, жұт, соғыс және соғыстан кейінгі жылдарды қамтиды. Ана махаббатының күші бас кейіпкердің қиын кезеңдерде аман қалуына, ауыр сынақтарды еңсеруіне және аман есен үйіне қайтып келуіне көмектеседі.
«Районы», 2016
Фильмде 1980 жылдардың соңындағы Алматы қаласындағы өмір көрсетіледі. Қаланың шетінен орталыққа көшіп келген оныншы сынып оқушысы Әрсен жаңа мектепке ауысады. Алып шаһарды қанша жатырқаса да, жаңа ортаға бейімделу үшін өзінің ұстанымдарына жат заңдылықтарға мойынұсынуға мәжбүр болып, қатыгездік пен қылмыс әлемінің ықпалына түседі.
«Кәсіпкерлер», 2018
Фильмнің сюжеті 90-жылдардағы мемлекеттегі дағдарысты, нарықтық қатынастардың басталу кезеңін сипаттайды. Бас кейіпкер достарымен бірге табыс табудың жолын іздестіріп, бизнес ашуға бел буады. Алайда, бизнес әрқашан тәуекелге апарады және жас кәсіпкерлер жетістікке жету жолында көптеген нәрселерді құрбан қылуға мәжбүр болады.
«Томирис», 2019
Кең ауқымды тарихи драма біздің заманымызға дейінгі VI ғасырда болған оқиғаны суреттейді. Фильмде жақындарынан айырылған кішкентай Томиристің сақ патшайымы лауазымына дейінгі өмір жолы баяндалады. Ол махаббат пен өз халқының тәуелсіздігі үшін сол замандағы ең қияметті соғыста Парсы империясының патшасы Кирмен шайқасады.
Суреттің дереккөзі: nur.kz